भूकम्प प्रभावितलाई सीबीफीनको १० लाख
काठमाडौँ । पश्चिम नेपालमा आएको भूकम्पका कारण प्रभावितलाई सीबीफीनले १० लाख रुपैयाँ आर्थिक सहयोग गर्ने घोषणा गरेको छ । शुक्रवार राती आएको भूकम्पका कारण पश्चिम रुकुम र जाजरकोटमा जनधनको ठुलो क्षति भएको छ । यही भूकम्पबाट प्रभावित स्थानीयलाई बैङ्क तथा वित्तीय संस्था परिसंघ (सीबीफीन)ले लाख दिने घोषणा गरेको हो ।
सीबीफीनले राष्ट्रिय विपत्ति आइलागेको यस कठिन अवस्थालाई संवेदनशीलरुपमा लिँदै खाद्यान्न, औषधोपचार, न्याना लत्ताकपडासहितको बसोबास आवश्यक रहेको जानकारी पाएकाले आर्थिक सहयोग गरेको जानकारी दिएको छ । सीबीफीनले प्रभावित जिल्लाका प्रमुख जिल्ला अधिकारीहरूसँग सम्पर्क गरी त्यस क्षेत्रमा आवश्यक रहेको वस्तुबारे जानकारी समेत लिएको छ ।
‘राहत सामाग्री जुटाउने र सम्बन्धित क्षेत्रमा पुर्याउने पवित्र मानवीय सेवाको कार्यमा सहयोगी हात अगाडि बढाउनुहुन सम्बन्धित प्रदेश÷जिल्ला तथा स्थानीय निकायहरूमा सञ्चालित सम्पूर्ण बैङ्क तथा वित्तीय संस्थाहरूमा हार्दिक आग्रह गर्दछौँ’ सो संस्थाले जारी गरेको विज्ञप्तिमा भनिएको छ ।
जनधनको क्षतिसहित कठिन अवस्थामा रहेका भूकम्प पीडितहरूको सहयोगार्थ सदस्य बैङ्क तथा वित्तीय संस्थाहरूले सहयोग घोषणा गरिरहेको जानकारी प्राप्त भइरहेको छ । यस संवेदनशील घडीमा बैङ्क तथा वित्तीय संस्थाहरूबाट स्वतःस्फूर्त सहयोग भइरहेकोप्रति सीबिफीनले धन्यवाद समेत व्यक्त गरेको छ । साथै, राहत सहयोग उपलब्ध गराइदिन समेत सम्पूर्ण बैङ्क तथा वित्तीय संस्थाहरूमा हार्दिक अपिल गरेको छ ।