एटिएम ह्याक प्रकरणः प्रहरीको बयानमा आज पनि गएनन् नेप्सका सिइओ
बुधबार, १८ भदौ २०७६, १७ : ४८
काठमाडौं– चिनियाँ ह्याकरहरुले नेपाल इलेक्ट्रोनिक पेमेन्टको सिस्टम (नेप्स) ह्याक गरी साढे तीन करोड चोरेको विषयमा अनुसन्धान गर्न नेप्सका सिइओ प्रविण क्षेत्रीलाई बयानका लागि बोलाए पनि विशेष कारण जनाउँदै क्षेत्री बयानमा गएनन् ।
महानगरीय प्रहरी परिसरका डिएसपी होबिन्द्र बोगटीले रातोपाटीसँग कुरा गर्दै क्षेत्रीले बिशेष कारण देखाउँदै आज आउन नसकेको जानकारी दिए । क्षेत्रीलाई मंगबार (हिजो) पनि बयानका लागि बोलाइएको थियो तर उनी उपस्थित भएनन् । भोली बिहीबार १० बजे उपस्थित हुने जानकारी आएको डिएसपी बोगटीले जनाएका छन् ।
नेप्सले हाल १८ बैंक तथा वित्तिय संस्थाको कार्डको होस्टिङ र स्विचिङ सेवा प्रदान गर्दै आएको छ । बैंकरहरु यस घटनामा नेप्स जिम्मेवार रहेको बताउन थालेका छन् ।